Det var ei tøff utfordring som venta laget i 2025. Den nye Fylkesserien består av dei sju beste laga frå heile Møre og Romsdal, der tre av motstandarane er akademilag for toppklubbar. Likevel har Volda-jentene bevist at dei høyrer heime i dette selskapet – ein prestasjon i seg sjølv.

Grunnlaget for suksessen vart lagt allereie i januar. Gjennom vinteren har det vore intensive og gode treningar med fokus på både ballferdigheiter, styrke og kondisjon. Eit sportsleg og sosialt høgdepunkt var utvilsamt treningsleiren til Tyrkia i vinterferien. Her fekk laget trent godt under flotte forhold, bygd relasjonar og ikkje minst testa seg internasjonalt. Sigeren på 2-0 over det tyrkiske toppserielaget Antalyaspor vart ein solid tillitserklæring som gjengen tok med seg inn i sesongen.

Vårsesongen starta med ein pangstart borte mot Hødd og ein solid heimesiger mot Molde 2. Laget visste at tøffe kampar mot lag som AaFK Fortuna 2 og Blindheim venta, men dei heldt fram med å plukke poeng. I bortekampen mot Herd sikra dei ein ny siger, der det var ekstra kjekt å sjå den 15-årige debutanten Nyariek Reath kome inn og vise både musklar og eit ekte scoringsteft. Sjølv i dei siste kampane før ferien, der skadar prega laget og det vart knepne tap mot Hødd (0-2) og Blindheim (1-3), leverte jentene jamne og gode prestasjonar.

Ein nøkkel til den sterke våren har vore miksen i spelargruppa. Fleire unge spelarar har tatt nivået for første gong, og har fått uvurderleg erfaring. Desse har blitt støtta av rutinerte krefter, som Camilla og Irene, som stadig imponerer og fungerer som flotte førebilete. I tillegg har Hanna og Ida trådd til og gitt uvurderleg hjelp i ein periode med skadar – eit prov på den gode kulturen i og rundt laget.

Spelarane sjølve skildrar våren som lærerik, utfordrande, gøy og motiverande. Dei har fått kjenne på eit tempo der val må takast raskt for å unngå å bli straffa, noko som er den beste skulen for vidare utvikling.

Med blikket retta mot hausten, står døra open for nye spelarar. Laget håpar at dedikerte jenter i området, og studentar som kjem til Volda, vil ta kontakt og vere med på reisa vidare. Med lag i både 3. og 4. divisjon, finst det eit passande nivå for mange.

No ventar ein velfortent sommarferie. Første kamp i haustsesongen er borte mot AaFK Fortuna 2 den 17. august. Det gledast – både på bana og på tribunen!